ليه الناس في الشارع مبتضحكش و دايما ضاربين بوذ و علي كامل
الإستعداد لجر الشكل والخناقات - مثال عربية السيدات في المترو ؟!
ليه الشيوخ في خطب الجمعة بيزعقوا و يشخطوا في الناس ؟! وليه محدش من
اللي بيصلوا فكر مرة يكلم الشيخ بعد الخطبة أنه ميزعقش وأنه لو أتكلم بصوت معقول
الناس هتتقبله أكتر ؟!
طب ليه الناس في المترو أو في أي مواصلات عامة بيزقوا بعض و مش بتكلم
علي الزحمة لأني عارفة ثقافة الزحمة عندنا أنا بتكلم لو كان حتي في أماكن فاضية
كتير أو واقفين و هننزل و المكان واسع ؟!
ليه أي منقاشة أو دردشة فيها وجهات نظر مختلفة بتقلب بخناقة و الناس
تتحمق و تتضايق و ممكن تتخاصم مع أنهم عارفين أن لو وجهات نظرهم متشابهة مكنش
هيبقي في مناقشة أصلا و أن أساسها أنهم عندهم أرارء مختلفة بيعرضوها علي بعض ؟!
طب ليه لو حد شافنا في الشارع و سلم من بعيد وفضل أنه يمشي لوحده
عشان متضايق أو مش مضايق أو أي حاجة أو حتي عايز يمشي لوحده وخلاص إحنا بنزعل منه
مع أن من حقه أنه يبقي ليه المساحة بتاعته ؟!
ليه لو جيت دلوقتي عملت ريموف لحد من الفيرينذ أو حد كلمني ومردتيش
بيضايق ؟! ليه ميفترضش أن دي حرية شخصية و أن ممكن مثلا أكون وقتها مش عايزة
أرد علي تليفونات أو مش عايزة أكلم الحد ده بالتحديد أو أي حاجة ؟
