قواعد الدايرة السبع

 

قاعدة (1) من قواعد الدايرة السبع:
أبعد نقطه بالنسبالك
جوا الدايره...هيّا مكانك
ولأن أساسا ف الدايرة
هنا هو هناك
ف طبيعي تحس إنك عايش
بـ إتنين جواك

القاعدة (2) من قواعد الدايرة السبع:
كل أمّا تحس إن الصورة ..
مبقاش فيها مراكب سايرة ..
افتكر إنها اصلا كورة ..
وفي مسقط رأسي تبان دايرة ..
ف عشان كده لما بتتقفل ..
وتسد ف وشك مليون باب ..
من غير أسباب ...
متقولش الحظ اداني قفاه ..
و إنه طلع فالصو وألامونيا ..
الحظ يا عم اداك وشه ..
م الناحيه التانية من الدنيا..

القاعدة (3) من قواعد الدايرة السبع:
فرق السرعات جوه الدايره
بينك وما بين كل الماشيين
هوا اللي حيقدر يضمنلك
إن انتا تقابل ناس تانيين

القاعدة (4) من قواعد الدايرة السبع:
كل الطرق ف الكون...
بتلف على واسع....
ف مفيش نفر فاكر....
إزاي رجع أو لف...
شوف الإله حكمته....
ف الدايرة عامله إزاي....
و إزاي محجّمنا .....
من غير ما يعمل سقف....

القاعدة (5) من قواعد الدايرة السبع:
إزاى تعرف..
مين سابق مين جوه الدايرة..
و من فيها قطع أطول مشوار..
مش ممكن برضه اللي في ضهرك..
يطلع سابقك..
وانت اللي حمار؟

القاعدة (6) من قواعد الدايرة السبع:
الصدق الخالص.. خالص.....
والكدب المحبوك جداً....
عمرك ما حتعرف تعرف....
الفرق ما بين الإتنين....
إتنين بيلفوا ف دايرة......
و إتقابلوا ف نفس النقطة.....
مع إن ف أول لقطة....
كانو ماشيين ف إتجاهين...

القاعدة (7) من قواعد الدايرة السبع:
ف الدايره مفيش واحد بيتوه
غير اللي يقرر يوِقِف لف
ف اللفّة مفيش واحد مجروح
إلا أما آخرها بتلقاه خّف
ف خلاصة القول
عيش عرض و طول
و ما تخفشي من الموت م الخرابيش
حتخاف و توقّف لفّ...تموت
حتراهن و تكمّل
حتعيش


مصطفي أبراهيم  :)