أزاي تعرف أن ربنا موقفش نموك؟
أزاي تعرف أن نموك موقفش
و أنك لسه ماشي موقفتش و ثبت
أزاي تعرف أنك لسه موجود
أنك متحولتش حاجة زي بقيت الحاجات
أنك لسه ليك لازمة مش وجودك زي عدمه
لما تلاقي نفسك متلغبط و بتفكر و تتأمل و
تحلل
لما تلاقي نفسك أدامك ميت طريق
ومحتار و بتفكر تاخد أنهي واحد منهم
لما تلاقي نفسك مستغرب نفسك و بتحاسبها
لما تلاقيك عايز تكون في خمستاشر مكان في
نفس الوقت
و تفضل تعمل "تو دو ليست" لحد
عشرين سنة ادام
لما تلاقي نفسك بتجرب تلاتلاف حاجة و متكملش
في ولا حاجة
لما تلاقيك بتحلم وتحلم و تحلم و تخطط و
تملي كراساتك بالخطط
لما تعمل كل ده و برضه تبقي لسه مش حاسس أنك
وصلت
تبقي لسه عايش و لسه موجود
لسه نموك موقفش و بقيت حاجة من ضمن
الحاجات
لسه ربنا بيحبك و بيديك أمل و حلم و طموح
لسه بيحبك و منحك نعمة التفكير و التأمل
لسه عايزك تتلغبط و تفكر و توه
عشان كل ما توه اكتر و طرق الدنيا ادامك
تكتر
تفكر أكتر و تكتشف اكتر و تكبر أكتر و تعرف
أكتر
كل ما تحتار أكتر كل ما تتأكد أنك بره
الصندوق
أنك مش ماشي في الصف و بتعمل نفس الحاجة
اللي بيعملها كل الناس
أنك مثبتش ولزقت في مكانك و حلفت ما تتعتع
أنك عايش و بتستخدم كل حواسك علشان تبقي
فعلا موجود
مش خيال و لا ضي و لا حاجة من ضمن الحاجات
لما تتضايق من التوهان و التفكير و تتخنق و
تقول لنفسك عيشي زي الناس
أفتكر أنك في نعمة أسمها التغير أسمها تبديل
و حركة و أنك مصدتتش و ثبت
أفتكر ده و أفرح أنك كبرت شوية و فهمت شوية
أكتر
و بقيت موجود و بتتحرك مش لازق في مكانك زي
أي حاجة موجودة
