سحر الموجي

- النار بتجلي الجوهر النفيس اللي جوانا و تحرق الأكاذيب.. الكلمات والأفكار المحفوظة اللي ورثنها من غير ما نسأل عن معناها أو عن جدواها بالنسبة لحياتنا .. كلها تتحول لرماد يطير مع الريح وفي لحظة سحرية تبعث العنقاء من رماد التجربة و نكتشف القوة اللي جوانا و نكتشف المعرفة و الحكمة اللي جوانا و فيض العطاء و المحبة اللي ممكن نمنحه لأننا محتاجين نمنح و نتواصل مش عشان المجتمع حفظنا و قالنا لازم نكون لطاف و طيبين و نسمع الكلام و مفيش مشاكل نعملها و نمشي فيي طرق مرسومة ...

- السندريلا اللي في طور الإنتظار عمرها ما هتصدق أن في جنية جواها ولا للحظة هتدور علي العنقاء ..

- كلنا عندنا أختيار بيبدا بسؤال يؤدي لسؤال و خيط من الأسئلة يمر من الجحيم يبعث العنقاء تفتح باب السحر اللي جوانا فنكتشف الكنوز المدفونة جوانا .. خير - حب - عطاء - رحمة - شغف .. أفق أد السماء والبحر للإختيار و الفعل .. كلنا عندنا أختيار ..

- التمرد مش ببساطة رفض شخص أو علاقة أو سيطرة .. التمرد هو رفض قيود و أغلال و سلاسل حديد بتقيدنا في مكانا .. التمرد هو خطوة للأمام هتحصل سواء قبلنا أو رفضنا .. التمرد هو تغير و تبديل و إختيار مسالك جديدة و أفكار مختلفة عن وجهة النظر السائدة في مجتمع ما في لحظة ما .. هيكون أسهل علينا لو فهمنا أننا لازم نمشي للأمام ..

- الخيال له جناحات تنقلنا لمناطق مختلفة جديدة وجميلة وغريبة .. القلب له جناحات بتروح للي بنحبهم و نزورهم .. الروح لها جناحات تحررنا من اللحظة .. من الجسد اللي سكنينه و ترتفع بينا لمناطق أعلي و أعمق من الوجود ..

:)

:)

سحر الموجي