التعليم: هو وسيلة قمعية تهدف للقضاء علي كل
قدرات الطالب علي التخيل و الإبداع و سلبه أي قدرة فطرية علي التفكير و التأمل
ليتحول بالنهاية لبغبغان لا يتقن سوي تكرار ما تم تلقينه به مع هز الرأس بإستمرار
دون إبداء رأي أو إتخاذ أي قرار.
)تحضرني الأن رائعة
الباش مهندس حمزة نمرة ... يا هنا يا هنا اللي يتعلم عندنا(
مشكلة أزلية بقابلها كل يوم .. مشكلة مش بس في طريقة التفكير لأ دي
حتي في طريقة المعاملة بين البني أدمين .. إزاي تحاول تعلم حد خلاص مخه أوشك علي
الصدأ .. و المشكلة أنه مش ذنبه أنه مخه صدي ..
فمتبقاش عارف تعمل إيه .. تساعده !! طب
إزاي؟
دخلت السكشن و شرحت و كتبت علي السبورة .. فهموا الكلام بس معرفوش
يطبقوه
نصهم نقلوا الكلام غلط من علي السبورة .. و معرفوش ينطقوا أسامي
الحاجات بعد ما قلتها
بصيت لهم و أفتكرت لما كنت أدهم .. أزاي كنت كتير مبفهمش بس بحاول و
أسأل .. بحاول أساعد نفسي قبل ما أطلب من حد أنه
يساعدني و يفهمني .. كنت بقدر مجهود اللي بيعلمني و أحاول أوصله أني بتعب عشان
أفهم و لو مفهمتش يسامحني
يمكن بنظلمهم لما ما نحسش بمعانتهم .. بأنهم مش فاهمين و مش عارفين
يفهموا إزاي
بس المشكلة مش علم و لا دراسة .. المشكلة في السلوك نفسه
ساعات بحس أنهم مش مهتمين أنهم يفهموا أصلاً ولا يعرفوا .. يمكن عشان
مش شايفين المستقبل
مش شايفين نفسهم في أصلاً .. مش لاقين لهم مستقبل فمفيش حافز أنهم
يبذلوا مجهود
هيبذلوا مجهود ليه أصلاً ما هو كله محصل بعضه
هما مش شايفين نفسهم في الحاضر ولا حاسين أنهم جزء منه عشان يحسوا
بالمستقبل و يفكروا فيه
إمبارح كنت في كورس .. اللي بيعَلمنا قالنا أن في فرق بين كلمة
"طالب" و كلمة "مُريد"
و إن الطالب بيبقي زي اللي بيقولك هات .. هات اللي عندك و خلَصني .. بس
المُريد بيبقي فعلاً حريص أنه يتعلم .. أنه يعرف .. بيبقي شَغوُف أنه يعرف و يفهم
و بيسأل علي ده و يبحث عنه و يتعب عشانه
كانت مرة واحدة بتحكي أنها راحت رسالة لاقيت بنت صغيرة بتعيط ..
سألتها مالك .. قالتلها الأبلة مجتش .. أستغربت طب و ليه
بتعيطي؟ البنت طلعت بتتعلم القراءة و الكتابة و قالتلها أنا فاتني كتير و عايزة
أعوض اللي فاتني !! هو إزاي البنت دي وصلت للمعني ده؟ .. إزاي فعلاً صادقة في
رغبتها أنها تعرف و تفهم؟ .. إزاي بقت مُريده مش مجرد طالبة؟
برجع و أفكر في "مجانية
التعليم" هي دي فعلاً كانت خدمة و لا أكبر خدعة وقعنا فيها و علَمت علي كل
الأجيال اللي وراها؟ .. هو فعلاً لازم كل الناس تتعَلم زي بعض؟ .. هو
لازم كل الناس تتعلم أصلاً؟! و لو لأ .. طب علي أساس أيه نختار اللي يتعلموا؟ .. و
هل مثلاً ممكن يكون في تعليم أساسي يدخله كل الناس و بعدين نتقسم لتعليم فني
بأشكال مختلفة .. و بعدين يبقي قليلين اللي يكملوا جامعة و بعدها قليلين أوي اللي
يكملوا دراسات عليا؟ .. التفكير ده بحسه منطقي .. بس
برجع و أتزنق عند كلمة "تكافؤ الفرص" و أسأل نفسي هو فعلاً لازم يبقي في
تكافؤ فرص بين الناس؟ .. طب و لو لازم -ولو أني أعترض- طيب هو أحنا فعلاً عندنا
تكافؤ فرص؟ .. يعني لما أعلم عشرة كويس ولا أعُك عشان أعلم عشرتلاف بدلهم؟
كنت بفتكر أن في فرق بين الجامعات الحكومية و الخاصة و بقول يمكن
هناك في تعليم .. و بين المدارس المتميزة و العادية .. في فروق واضحة و صريحة و
بحسها لما بتعامل مع طُلاب من جامعات حكومية و تانين من جامعات خاصة و بردوا في
المدارس .. أنا شخصياً دراستي طول عمري في مدارس عادية و جامعتي حكومية و كنت بحس
بفرق التفكير بيني و بين غيري اللي أتعلموا بشكل أحسن .. بس
بردوا نرجع لنفس النقطة .. هما حتي لو كل اللي أتعلموا في الجامعات دي أتعلموا
كويس .. هما فعلاً هيفيدوا المجتمع باللي أتعلموا و يفيدوا نفسهم؟ .. طب أد إيه
بيتخرجوا من الجامعات دي كل سنة؟ .. طب بيعملوا إيه بعدها؟ بيفضلوا هنا ولا
بيسيبوا البلد و يمشوا؟ .. و لو فضلوا بيفيدوا المكان اللي أتولدوا فيه ولا بياخدوا
منه بس؟
لو رجعت تاني لموضوع التعليم الفني .. و لفكرة الطالب و المُريد
هلاقي أنهم لازم يتربطوا بثاقفتنا .. بنظرتنا للناس و تصنفينا الدائم
ليهم بالشكل و اللون و غيرها .. الناس عشان تّدخل ولادها تعليم فني و تبقي مبسوطة
بيهم .. بدل ما تعلمهم و يتخرجوا زيهم زي ألاف غيرهم من غير ما يتعلموا فعلاً أو
حتي يعملوا حاجة باللي بيقولوا أنهم أتعلموا .. لازم نغير فكرة الناس و المجتمع عن
التعليم الفني .. و أن اللي بيدخله مش لازم يكون أقل من اللي حواليه .. و أننا
فعلاً لازم نصدق أننا مش زي بعض و أن ربنا خلقنا بقدرات مختلفة و مش كلنا ينفع
نتعلم نفس التعليم .. يعني بمعني تاني محتاجين نغير أسلوب التفكير و ثقافة الناس
في الحته دي .. و ده هينعكس علي فكرة المُريد .. ما هو لو أعترافنا بأن مش كلنا زي
بعض و مش كلنا لينا نفس القدرات و أن ده مش عيب .. هيكون اللي بيكمل تعليم أو
بمعني أكثر تأدب اللي بيتعلم تعليم مختلف يتطلب مزيد من المجهود .. هيكون فعلا مُريد
مش مجرد طالب
برجع و أفتكر أليسون و دانيال و أم رجب
الربط بينهم عجيب .. معرفش أزاي وصلت لأني أذكرهم في جملة واحدة ..
بس أنا حسيتهم مرتبطين ببعض
خلينا نبدأ بأم رجب -تعصب مني ليها :)- أم رجب قابلتها في قرية معارك
في بني سويف .. كانت بتشتغل عشان تعلم بناتها و إبنها رجب و تّطلعهم دكاترة و
مهندسين .. بتتعب أوي عشان حلمها ده .. بس أنا كنت مُشفقة عليها .. فَكرت في
كلامها و صِعبت عليا .. هو أنتي يا أم رجب تاعبة روحك و شقاينه عشان تطلعيهم من
غير شغلانة و لا حتي تعليم .. الكلام يبان غريب .. بس ده الحقيقة -اللي أنا شايفاها
من وجهه نظري- أيوة أنا شايفها تعبانة علي الفاضي .. لما يتعلموا و يتعلم رجب .. و
ده علي فرض أن القرية دي فيها تعليم أصلاً -بينجحوا العيال فيها فكل المرحلة
الإبتدائية حتي لو مرحوش الأمتحان .. معندهمش مكان للي هيسقط- .. لما تعلميهم بقي
هيستفيدوا إيه؟ .. علي فرض أنه ممكن يبقوا دكاترة فعلاً ..
أه بعد كده هيعملوا إيه؟ .. هيسيبوا معارك و يِرحلوا و هكذا .. مش
معترضة علي حقهم في التعليم .. بس معترضة علي أنها متعرفش هما هيعملوا بي أيه ..
ليه متعلمهومش عشان مشروع مثلاً يكملوا بعدها .. أو تعلمهم تعليم أساسي و بعدين
يساعدوها علي المعيشة و لو حد منهم شايف في نفسه مُريد يكمل تعليم .. بس لو مشفش
مش لازم يتحط في قالب "الباز أفندي" اللي أحسن من الكل عشان معاه شهادة
و هو أصلاً حمار ولا يفهم حاجة و ممكن كمان لا شغلة ولا مشغلة .. و بعدين من قال
أن التعليم في المدارس أصلاً .. كان زمنا بقنا من أوائل الدول في العالم علي كل
اللي بيتعلموا و ياخدوا شهادات كل سنة و عددهم بالملايين
أليسون و دانيال بقي قابلتهم في كورس إنجليزي .. دانيال درس حاجات
كتير و معهوش شهادة و جاي مصر يشتغل .. ملهوش حاجة يعرف يعملها غير لغته اللي
يعرفها فبيعلمها للناس ..
أليسون زيه .. أليسون كان عندها حاجة و تلاتين سنة ولسه مخلصة ماجستير .. قولتلها
بمنتهي الساذجة و التلاقئية "و هتبدأي أمتي الدكتوراة" .. قالتلي مش
لازم أصلاً أكمل و أخد دكتوراة .. أليسون كانت بتشتغل و تصرف علي نفسها بعد مخلصت
الثانوي و لما لاقيت أنها مُريدة في حاجة معينة كملت دراسة و بردوا بتشتغل
مش بقول الناس متتعلمش
بس بقول أحنا مختلفين
مش كلنا بنعرف نتعلم نفس التعليم
أحنا كتير أوي بنخلص دراسة جامعية
و كتير بردوا بيعملوا ماجستير و دكتوراة
بس هل فعلا كل الكتير دُول يستاهلوا ياخدوا الدرجات العلمية دي؟
طب هل كل دُول فعلا فادوا نفسهم و اللي حواليهم بيها؟
مش عارفة .. بس اللي أنا أعرفه .. أن اللي إحنا فيه ده "عُك عُك
ربَك يفك" و ربنا يسامحنا بقي علي اللي بنعمله في عقل الطلبة و نفسيتهم .. و
ربنا يسامحهم علي الإحباط اللي بوصله بعد كل سكشن
13-3-2012
