الوحدة

مع الوقت إحساس الغربة وسط كل الدواير بيزيد، إحساسك بعدم إمتلاك أي مكان برضه بيزيد، و أنك مش بتنتمي لأي بقعة في الأرض، و كأن في حد جابك هنا و نسيك، من غير أي تعريف مباشر أو حتي غير مباشر باللي بيحيط بيك، من غير ألفة أو راحة أو حتي سابق ونس باللي أنت فيه، و مهما تنقلت بين أماكن و بين ناس تحس برضه أنك لا تنتمي إلا لنفسك وبس..

يمكن يكون مؤلم و يمكن يكون قاسي، بس الأكيد أنه أحياناً كتير بيكون ده منطقي جداً و حقيقي، العالم ملوث، و اللي بيملوه مشتركين معاه في نفس التلوث، و أصحاب النور هالتهم بيتم إستنزافها وسط الوسخ ده فبالتالي غالباً بيتجنبوا الدوشة دي و يبقوا برضه لوحدهم، لو ربنا وصلك بحد فيهم بحس أنه علي سبيل العلامة اللي بتقولك لسه شوية متكفرش بالأرض، لسه شوية و في نور بس محجوب، يمكن ده بيقلل من حجم الكارثة، أنه ع الأقل في نور بس أحنا مش لاقينه، و أنه مش كل الدنيا عتمة بس إحنا رجلينا لسه معرفتش طريق لمكان غير العتمة..

عدم القدرة ع التواصل هي أهم مشاكل الحياة، و اللي هي بتودي لوحدة مقننة، وحدة لابد منها، وحدة يمكن تكون شاركت في إختيارها بإنك مش عايز تتعلم التواصل ده بيكون إزاي، أنت حقيقي عارف أنك مش بتقدر تتواصل بس تقبلت ده، و بالتالي كأنك تقبلت الوحدة و أختارتها.. 

أنت أكيد مش عايز تبقي لوحدك، بس لما بتشوف أيه اللي طاقتك تتحمله أنت بس اللي بتقدر تحدد، تبقي وحيد أهون ولا تبقي مُستنزف، الحقيقة إن الإستنزاف بيقضي علي كل اللي جواك من طاقة و نور، الوحدة مؤلمة أحياناً، بس من السهل أنها توصلك لحالة وجدانية، أو يمكن مش حالة بس إحساس كده بالتواحد مع نفسك، و يمكن مع الكون و الطبيعة، ليك سكك كتير بعد الوحدة تخليك تستمتع بالدنيا و بنفسك و بالوجود، بس الإستنزاف مبيكونش له أي سكة، لأن الإستنزاف بيكون نهاية مش بداية..

بناءً علي كده بقي متجيش تعيط و تستنكر وحدتك، لأنك إختارتها، و رضيت بيها، و شاركت في وجودها، و لأنك سعيت ليها عشان تحافظ علي طاقتك و روحك، يعني في الأول و الأخر هي من إختيارك و صُنعك، ممكن يكون إختيار مُجبر عليه لأنك كنت بتختار بين إختيارات متحددة، يعني مكنش في غير بديل واحد، بس حتي مساحة الإضطرار دي في جنبها مساحة إختيار، و كله في سبيل راحتك و لو حتي كانت راحة مش كاملة..

إصطحب نفسك، إمتليء بيها، متهربش منها..

حافظ علي نور روحك، ووصلها بالكون و الفطرة..

وخليك مسؤل عن إختيارتك حتي لو مش كلها بكامل إرادتك..

بلاش طفولة و هروب من مسؤليتك تجاة إختياراتك..

و حتي الألم بيجلي الروح، بس الدوشة بتشوه الروح..