الكتابة

بيبان أوي شكل كتابة الرجالة من الستات، نصوص الرجال متزنة و محكمة في اغلب الاوقات و فيها شيء من الثقل كده من غير انفعالات مبالغ فيها او تحيُزات لاي جنب، و الرجالة اللي مش بتكتب كده بيبقي في في اسلوبها ركاكة بينة جداً، بحس أن الراجل ليكتب كويس لا ميعرفش يكتب.

الستات مش كده، كلهم بينفعلوا بشكل كبير و بيتحيذوا لجوانب محددة، غير طبعاً أن عقدنا و كلكيع المجتمع بتبقي مركز الموضوع و لب الكتابة، و بيبقي في كم كبير جدا من الانفعالات و المشاعر، و أحياناً كتير بيكون في وصف مفصل لادق التفاصيل، يمكن تكون الستات بتحب التفاصيل أكتر، دي معلومة مش متأكده منها.

الإتنين ممكن كلامهم يبان حزين، و يحملوا قضية مهمة و بصدق، بس أدواتهم للتعبير مش واحدة، الراجل اللي بيكتب كويس بحسه عنده حبكه، و بيوزن الكتابة بكم معقول من المشاعر و العقلانية، الست بتتحدف دايماً في إتجاه المشاعر اكتر و بشكل تلقائي بحس في احيانا كتير إندفاع في ده، و كمان حماسها بيبقي ازيد، مش هقدر اقول احسن و اوحش، لأن في ستات كتابتها حنينة جداً، و بتحس كأن ايد اللي بيكتب خرجت من الكتاب بتطبطب عليك.

 أغلب الستات اللي قرتلهم و اللي هما اكتر من الرجالة كانوا مهتمين بالتفاصيل جداً و منهم اللي بيخفوا بالكتابة من عقد معينة أو خلينا نقول ألام معينة عملها المجتمع ، رضوي عاشور كم التفاصيل اللي في كتابتها أحياناً بيرهقني بس هي تعتبر متزنة بحد كبير في التعبير عن المشاعر أو صياغة نص بشكل معقول من ناحية الدراما و الإحساس، و أهداف سويف ستهم الحقيقة، بحس اني مش عارفة اروح فين الحقيقة، حنينة جدا الست دي في اللي بتكتبه، و في اتنين او تلاتة كمان كرهوني في الرجاله الصراحة و مش هقرالهم تاني. الرجالة في منهم اللي قريتله كذا حاجة و حسيت ان في حاجة غلط و كأن اللي بيكتب الكتب مش واحد، و في منهم اللي كان عظيم زي مريد البرغوثي كده، يالهوي ع الجمال، شاعر فعلا حتي في كتابة الرواية شاعر.

مقرتش كتير و اللي بقوله مش مهم بس حبيت أسجله :)