10 أكتوبر

إحساس إنك هين مُجهد جداً، إحساسك بإنك متخصش عدد كبير من البشر، يمكن تكون متهمش حد من الأساس، إحساس مُرهق بس منطقي جداً برضه وسط زحمة الدنيا و ربكتها، وسط الزيف و الدوشة و الجري و الحاجات الكتير اللي مش حقيقية، منطقي جداً وسط ناس أصلاً مش حقيقية مع نفسها و كتير، و وسط كل اللي مش عارفين نفسهم دول، و وسط اللي بيهربوا من نفسهم، و وسط إجهاد الدُنيا و مَسخها، وسط كل هذا العناء اللي البني أدمين بتعانيه عشان بس تعيش، وسط كل ده تحمد ربنا أوي أنك لاقي لنفسك مكان، إنك لاقي نفسك أصلاً، عارفها و عارف تفهمها أو علي الأقل قادر تستوعب أهمية أننا نعرف نفسنا أكتر، قادر تواجه نفسك بضعفها و بقوتها، و قادر تعذرها و تحتويها، ده في حد ذاته يكفي، و بيتهيألي مش قليل  كتير كمان.

الناس طاقات، و كل واحد ليه طاقة و سعة و ليه قدر يقدر يشيل لحد عنده، مش منطقي أننا نبقي أعلم الناس بضعفنا، و بقدرتنا اللي بالعافية مكافينا و نلوم ع الأخر أنه مش قادر يساعد و يشيل، مش كل الناس بتقدر تساعد نفسها أصلاً، هتجيب منين قدرة تشيل شيل الناس و انت شيلتك قسمت ضهرك، الحياة مُجهدة و المعافرة فيها بتستنزفنا للأخر، بتتعب و بترهق و بتخلينا مشايين مطبطبين ع نفسنا بالعافية، يبقي نُعذر بعض أفضل بكتير من إننا نقضي اللي باقي من طاقتنا في اللوم.

كنت باخد حاجة في علم النفس، و الراجل كان بيتكلم عن حاجتين مهمين جداً، أولاً أننا لازم نحط إعتبار للظروف، و إن الأشرار أغلبهم نتاج ظروف سيئة مش أكتر، و أنك محتاج طول الوقت تحط نفسك مكان الأخرين، و أن ده بيسهل في العلاقات و حتي في المصالح المشتركة، من السهل جداً أننا نجلد اللي حوالينا لوم و تأنيب، بس صعب علي نفسنا نحط نفسنا مكانهم، نحط نفسنا مكانهم و نحاول نستوعب هما كده ليه، مش بستنكر أننا نزعل من تصرفات معينة، بس ممكن نزعل و نعذر، لو قدرنا نعذر من غير زعل يبقي أحسن، بس أنا شخصياً مش بعرف أعمل ده، و بحس ان بما إننا في الدنيا يبقي المنطقي أكتر أننا نزعل و نحزن، بس في زعل بغل كده و في زعل بصفا، نزعل و نصفي اللي جوانا و خلاص، من غير غل أو غضب.