ربنا كريم

و أنا كنت حد من اللي واخدين الحياة كأنها مشروع هندسي بيترسم بخطوط و معادلات و أرقام .. مشاوير و أنفاق و كباري و إتجاهات و لازم أوزع نفسي فكل حتة شوية .. الحياة كانت بالنسبة لي مشوار .. سباق اللي يوصل أسرع و مش مهم وصل لإيه و مش مهم بيحس بإيه و مش مهم هينبسط بالوصول و لا لأ .. الحياة سلسلة من الأهداف نوصلها و بعدين نتفاهم .. الغريبة بقي إن جرة قلم و وقوع خط واحد من الخطوط بيهدم كل ده و يلغبطني و أعطل شوية علي بال ما أستوعب أن الخطط أتلغبطت و أرسم خطط جديدة و ده منتهي الغباء و الخرف .. الحياة أصلاً قانونها الأول و الأخير هو اللا خطة .. الحياة بتمشي و إحنا اللي بنمشي معاها مش بنلوي دراعها عشان تمشي معانا مطرح ما نحب .. العبثية هي المنطق الأول و الأخير .. هي ماشية بنظام بس أحنا مش سهل ندركه عشان كده لازم أول ما تظهر كلمة ليه؟ نرسم كلمة ربنا جنبها .. الدنيا دنيا مش جنة .. الخطط بتترسم عشان نطمن أننا بنسعي بس تحقيقها مش دايماً بيحصل و ساعات بحس إننا بنعمل اللي علينا عشان ربنا يدينا اللي يناسبنا مش اللي عايزينه .. يعني أنا هسعي لشيء و أتعب و ممكن ربنا ميكتبوش ليا بس أكيد تعبي مراحش بلاش و هيديني بداله اللي يناسبني..

أنا لاقتني النهاردة مضايقة حبة .. مش عارفة ليه .. بس ربنا كريم أنا عارفة إنك كريم  :)