الفكرة بقي أن دول أول ناس بنخسرهم فحياتنا .. اللي بنتشدلهم أوي من أول مرة نشوفهم فيها .. بحس أننا بيبقي عندنا شغف نعرف هما مين .. مش بنتشد للي جواهم .. يعني مش بنتشد ليهم هما شخصياً .. إحنا بنتشد للغز اللي حواليهم .. بيكونوا زي مغامرة .. شغف خوض المغامرة بيهوسنا و يفضل يحفزنا ندور علي طرق ينفع نخترقهم بيها .. بس بمجرد ما بيحصل الإختراق ده بيبقي أدامنا طريق من إتنين .. إما نكمل معاهم و يبقي البعد عنهم مستحيل .. أو نديهم ضهرنا لأن دورهم فحياتنا بيكون حدوده اللغز اللي إتحل و المغامرة اللي خلاص خوضناها.
ساعات بحس إن ده بيحصل معايا .. بشد الناس زي المغناطيس عشان يعرفوني و يفهموني .. ساعات ببقي بالنسبة ليهم تحدي أو مغامرة .. -و أنا بقصد أكون لغز-.. بس أول ما بيفهموني الشغف بينتهي و يبعدوا .. بقيت بحس ده أوي أول ما يبدأ .. عشان كده بسَرع من تأثير المغامرة عشان أقلل مدة التجربة ... أول ما بحس بشغف أنهم يعرفوا أكتر بعرفهم اللي عايزينه و بعدين أتفرج عليهم من بعيد .. أول ما يلفوا و شغفهم يطفي بضحك من جوايا ضحكة طالب مجتهد نجح فالأمتحان و أتغر بذكائي و صدق حدسي و هما بيفرحوا أوي أنهم حلوا اللغز و مش عارفين أني أنا اللي حليتهلهم و حطيت علي قفاهم نجمة ..
قليلين اللي بيكملوا بنفس الإهتمام .. بس كتير أوي اللي بيكملوا و تفضل علاقتي بيهم قوية مبيبدأوش بالشغف و الإندفاع ده .. الإندفاع بيديني تأكيد أكتر أنها مغامرة مش أكتر..
مش قلت قبل كده مبحبش الextrems بتوقع العداد للصفر قُلنا.
