إرهاق فحب الله

بقيت بفكر فالموت أكتر ما أفكر فالحياة .. حاسة إن الحياة ملهاش أي معني من غير ما يكون ربنا موجود .. هتبقي دواير مقفولة علي بعض و أخرها جنان .. مش متخيلة إن الإنسان ممكن يعيش الحياة يستمتع بيها من غير غاية و هدف و رسالة يعيش عشانهم و من غير منطق أو منظومة أفكار تخليه يعرف يعيش .. مقصدش قالب أو صندوق يعيش جواه .. بس أقصد خطوط عريضة يعيش بيها و حلم يعيش عشانه و حد بيحبه أو حتي حاجة يعيش لها .. 

مش عارفة ليه فكرة إن أعيش عشان أنبسط و خلاص دي مش بحسها .. مش متخيلة نفسي عايشة عشان أكل أو لبس أو فُسح و بس .. مش متخيلة نفسي أعيش من غير ناس بحبهم ناس بساعدهم و ناس واقفين جنبي .. من غير حلم أتمني تحقيقه و خطوات أتمني أخدها .. حتي التجارب المؤلمة مش متخيلة الحياة من غيرها .. كان واحد -هو كان رخم بس ما علينا  -قالي قبل كده إن حلاوة الدنيا فمشاكلها .. مفهمتش ساعتها بس دلوقتي فهمت ..  

الموت كمان مربوط بالحياة .. أنا لو مفكرتش إن فالأخر في موت حاجات كتير هاخدها علي قلبي و حاجات كتير مش هيبقي ليها ضوابط .. ربنا كمان بيحكم كل الدواير و الإلتبسات دي .. مش عشان بخاف منه بس عشان دايماً بحس بضعفي و صغري أدامه .. المنطق ده مريح للعقل البشري .. البني أدام يتجنن لو فكر غير كده .. لو ملقاش سقف للحاجات هيشت .. ربنا هو فوق كل الحاجات و بيحكم و بيقدر .. لو مكنش منطق وجوده موجود هنفضل نسأل ليه مخدتش ده و ليه معملتش ده .. دايماً هيبقي سؤال من غير إجابة .. ممكن يوصلنا السؤال فالنهاية للجنون ..  

مش عارفة ممكن حد إزاي يؤمن بأن مفيش إله .. ممكن تكون في ناس بتشرك أو حتي بتعبد ربنا مش مظبوط .. بس عدم وجوده فكرة أنا مش قادرة حتي أتخيلها .. بحس أنهم ضمنياً بيبقوا مقتنعين إن في نظام بيحكم الكون و قوانين .. و أدام في نظام يبقي في حد بينظم النظام ده .. في إله .. ساعات بسرح فشكل ربنا و بخاف .. التفكير فالحتة دي بيخوف عشان عقلي مش قادر يدركه أو بمعني تاني بيرهق .. بس إرهاق لذيذ .. إرهاق فحب الله ..