تكلف

الناس بتتكلف بشكل واضح في كل تفاصيل الحياة، بيتكلفوا في التعبير و بيتكلفوا في الفعل، و أحياناً اللي حالتهم صعبة أوي بيتكلفوا حتي و هما بيفكروا، لما نحزن بنحزن للأخر أوي و لما نفرح نطنطط أوي و لما نحب نسيح أوي..

كنت بفكر في شكل العلاقات بين الناس و أكتشفت أن أغلبها بقي مشوة، احنا طول الوقت بنجري ورا تنفيذ الحلول النموذجية للسعادة و للود و القرب للناس و النتيجة بتبقي ولا شيء، الناس بتتكلف في الصداقة و الحب لما يفتكروا انهم بيحبوا سوبر مان او مصاحبين الهـ، بنحمل الطرف التاني عناء كبير اوي لما نتخيل انه هيغيرلنا الكون لمجرد اننا بنحبه و هو بيحبنا او في ود بينا، البني ادم بني ادم و ليه طاقات معينة و قدرات اكيد مش خارقة، و ليه خلق و ليه ظروف و ليه عيوب، و عشان نحب حد و فعلا يبقي في حياتنا بقوة مش محتاجين غير اننا نطمن في وجوده و في القرب منه و نتونس بيه، لا محتاجين حد يحللنا مشاكل حياتنا ولا ينط للسما يجبلنا نجمة،  و لا محتاجين ساحر يسحر الظروف و يدوبها، محتاجين صدق و اخلاص و بس و مراعاة لطبيعة اننا بني ادمين و الانسانية مخلقتش كائن خارق للعادة و خلتنا نحبه، اللي بنحبه ده بني ادم زينا ليه قدرات و ليه طاقة.

الأصل في العللاقات هو المشاركة، مشاركة الفرح و الحزن و الود و المشاكل، مش إيجاد حلول، و العلاقات القوية مش بتقوم علي السعادة اللي وراها انفعال يوقف القلب، العلاقات دي بتنتهي بإنتهاء الوهج بتاعها، العلاقات الحقيقة بتقوم علي طمأنينة و سكينة و راحة جاية من الوصل و القرب، و وسط اي عناء او متاعب للحياة العلاقات بتبان حقيقتها و مدي صدقها و قوتها..

الناس بتتكلف و تلف علب ملونة بورق ملون من غير ما تشوف العلبة فاضية ولا مليانة، اكتر حاجة بتخليني استغرب جواز الصالونات هو فكرة ان اللي بيتجوز يكون عنده شقة و عربية و مرتب و بس، طب و البني ادم؟! يبقي طيب و ابن حلال!! طب دي موصفات واحد اشاركه في مكتب و نعمل بيزنس سوا مش بني ادم اشاركه حياته؟! يقولولك يوووه بقي هو انتي عايزة كل حاجة!! استغرب اوي الرد ده، هو مين فينا دلوقتي اللي عايز كل حاجة؟! اللي بيدور علي الكامليات و رفاهية الحياة و الللي بيدور علي أصل الشيء و الود و الرحمة عشان يبقي في مودة؟!! 

التكلف في كل شيء و الزيف و المبالغة بيخلوا الناس يعملوا كل حاجة عشان يبقوا سعداء و برضه ميعرفوش، بيلفوا حوالين السعادة عشر لفات و مفكرووش مرة يقفوا لف و يخترقوا المقام اللي بيلفوا حواليه ده يمكن يكون ده هو سر تعاستهم!!! كل واحد فينا ليه قيمة بيلف حواليها طول حياته و بيحس براحة طول ما هي قريبة منه، و الناس بدل ما تلف حوالين قيم بتلف حوالين نفسها لحد ما تدوخ و تقع و تنتهي قصتهم بمجموعات مطولة من المشاوير و اللف و الدوران بدون وصول حقيقي لأي معني أو أي راحة...