الدين

زمان كنت بفرح أوي لما ألاقي بنت إتحجبت أو أعرف إن ممثلة لبست طرحة، و كنت بحس بعدم راحة من وجود غير محجبات في نفس المكان اللي أنا فيه، و أحترم أوي الناس اللي بدقن و اللي بتلبس لبس واسع و كده يعني، بعد شوية أتغيرت شوية فبقيت بحس إني يا حرام مضطهدة لما بقيت بروح الجامعة الأمريكية و ألاقي بنات open minded و ولاد كمان و كدهوون و الدنيا peace، ما بين المرحلتين شكل الحجاب أختلف و تقيمي للناس فضل تقريباً زي ما هو بس من غير عُزلة، يعني بقيت بتعامل مع كل الناس بس لسه جوايا نفس الفواصل و الحواجز اللي واقفة ع الشكل، و بعد كتير إكتشفت إن كل اللي أنا كنت فيه ده لا علاقة ليه بالدين أصلاً و أنه مشاكل نفسية و نواتج تربية و ثقافات مختلفة و حاجات ليها علاقة بالثقة بالنفس و بعلاقتك بالأخر، و حاجات ليها علاقة بإحساسك بالأمان التلقائي تجاه اللي شبهك شكلاً و أنك بدون تفكير مخك بيرفض يبص لدواخل اللي شكله مختلف عنك، و إن كل ده بيتغير مع الوقت و مع تكوين خبرات مختلفة عن الحياة و إحتكاك بأكتر من وجهة نظر، و نضج و حاجات كتير، حتي رؤيتنا للدين و لربنا و للناس و كل ده بيتكون مع الوقت و بيتغير، و إن في حالة من الطفولة كده بنحكم بيها علي الأشياء و إحنا صغيريين بس بعد شوية بنكتشف إن الدنيا أوسع و أبسط من كل ده، و إن مش دايما الحاجات الملفوفة بورق ملون حلوة ولا اللي شكلها متوسخ فعلاً متوسخة.