الكلام

الكلام اصلاً مش هو كل أدوات التعبير، الأصل في التعبير أنك تعبر بصدق عن اللي جواك، ساعات التعبير ده بيبقي بالسكوت، الصدق هو الأصل فكل ده و لو انت فعلاً صادق مش هتحتاج حروف و جمل هتلاقي روحك وصلت كل اللي أنت عاجز عن قولته، الناس بتستخدم الكلام أصلاً كوسيلة للتضليل في أغلب الوقت و ساعات من غير وعي كامل بده، يعني أغلبنا بيتكلم عشان يغلوش علي اللي بيدور فعلاً جوا نفسه، و مش بندي فرصة إننا نسمع حتي نفسنا..

التجربة أكدت ليا إن الإحساس بدواخل الناس بيكون أصدق بكتير من اللي بيقوله لسانهم، أصلاً لو أنت اتوصلت باللي ادامك بشكل ما و بصدق هتلاقي كلامه أهميته متتعداش الـ 5%، و ساعات كتير بتبقي بتضحك من جواك لما تلاقي تعبيرات الوش و اللي انت حاسه من اللي ادامك لا صلة له تماماً باللي بيقوله لسانه.. حتي طريقة قولة الكلام بيبقي ليها علاقة برضه بالصدق بس برضه ليها علاقة بمهارات اللي ادامك، يعني مش لازم يكون صادق عشان كلامه يبقي مترتب و مقنع، بس انت لازم تشغل إحساسك عشان تقدر تحدد هو الكلام فعلاً صادق ولا مزيف ولا غطا لشيء تاني ابعد، و مش دايماً بيكون اللي بيتكلم بيكدب بس ممكن يكون خايف او فاقد القدرة علي صياغة إحساسه و أفكاره في جمل، عشان كده إحساسك بيه و بمدي صدقة بيساعده و بيساعدك..

هو أنا اصلاً نفسي الناس تصوم عن الكلام، و بالذات اللي بينقل مشاعر، مش بحس ان احسن حاجة اني اعبر بلساني، كفاية اني حاسس و إحساسي صادق و بعد كده بيبقي في رسل كتير بنا بينقلوا الحب و الكره و الصدق، غير كده السكك بتتعطل و بتتسد و احنا يبقي كلامنا "ماسخ ملوش طعم"، بلاش كلام، خلينا صادقين و ربنا هيتصرف بمعرفته و يوصل صدقنا للـ تانين