أمراض مجتمع (2)

هي: إيه ده هو أنت هتديني درس ولا إيه؟!

هو: لأ بس الكلام علي الورق بيبقي أوضح، بصي بقي أنا عايز أتجوز عشان التالي .. كتب فنص الصفحة جواز و شد تحتها خط و فضل يُسرد بنود العقد، أه ما هو كان عقد شركة مش قاعدة تعارف بين بني أدمين، عقد و شركة محسوبة بالمليم بس الحسابات باظت لما سألته عنها، تنح و ساب القلم و نسي الشروط و أتكلم عنها لمدة ساعة، هي كمان تنحت من كتر الصدمة، هما دول بني أدمين و لا أشوله هواء مش نضيف و عاملة نفسها بتفهم.

* * * 

هو: إنزلي أنا هركنهالك عشان أنتي مبتعرفيش تركني..

هي: طب سيبني أحاول..

هو: قولت إنزلي !! 

طول الوقت أنتِ متقدريش، أنتِ متعرفيش، أنتِ متفهميش، أمته تفهم و تعرف و تقدر، ساعات القدرة هي أنك تدي نفسك فرصة عشان تقدر، فرصة إنك تجرب، فرصة إنك تقول أنا موجود، فرصة أنك تستخدم مخك فتلاقيك بتفهم و بتعرف، عمرنا ما هنعرف طول ما إحنا مجربناش، و عمرنا ما هنكون جربنا طول ما إحنا مغلطناش.

* * * 

هو: أصل الست تختار بين حاجتين، البيت و العيال أو الجواز..

هي: هاااا .. أحمد ربنا إني أخترت و أشتغلت..

هو: أصل الست اللي تشتغل متستهالش تتجوز، مش هينفع أصلاً، تتجوز إزاي طيب و مين يراعي البيت و العيال، و ساعات كمان تحتاج مساعدة من ست تانية، عشان كده أنا متفق مع مراتي من أول ما أتجوزنا إني ممكن أتجوز واحدة تانية، و هي بصراحة كانت بدورلي، و أهي بردوا تساعدها فشغل البيت. 

تساعدها فشغل البيت!! ده مش هيبقي بيت، ده هيبقي سجن النساء.

* * *

هي: البنت راحت ولا جت لازم تتجوز، متفتكريش إن الكتب و الدراسة دي ممكن تنفعها، أصلاً الكتب و الدراسة دي هي اللي قلبت دماغك، يا بنتي أفهمي أن الناس مش زي الكتب و لازم تعرفي أن الرجاله مش هتفهم ثقافة أو علم حد، كده مش هتتجوزي.

إن شاء الله عنها ما تجوزت، جواز إيه و نيلة إيه، ما هي لو إتجوزت كده يبقي هتتجوز حيوان بودان طويلة ميتهيأليش أنه هيكون إنسان و بني أدم.

* * *