الحكي

حكايات الناس دايماً بتبهرني و ساعات تانية بتصدمني، بنبهر بأن ممكن يكون حد مبين حاجة بس هو من جوا حاجة تانية خالص و بتصدم لما ألاقيهم شايلين جواهم كل ده، بتأثر بإحساسهم اللي بيطلع مع الحكاية، بيبان علي تعبيرات وشهم و نبرة صوتهم، بيتطلع بألم و ساعات بسخرية عاملة زي سخرية مرة علي حزن و وجع. الحكايات بتخليني أحس أد إيه الناس دايماً بيبنوا بس اللي يعزوه و بيخبوا جواهم كتير أوي، مش بيسمحوا لحد يفتح الصناديق اللي جواهم بسهولة، و مش ممكن تتفتح إلا لو حابوا يعملوا ده، عن نفسي بعمل كده ومقدرة أوي أن حد يحكي لحد حكاياته و كأنه قبل يشيل جزء أو طبقة من طبقات كتير بيستخبي تحتها، لما بيشلها بيبقي مرتاح و مطمن للي بيقولهم و يحكيلهم و عشان كده اللي بيسمع لازم يقدر قيمة اللي بيتسمع، مش بس الكلام بس لازم يقدر قيمة الفعل، مش كلنا بنحكي بنفس الراحة مع كل الناس و مش كلنا بنطمن و نثق فيهم فنديهم جزء مننا بحكايتنا، بحس أن اللي بيحكي بيتنازل عن جزء من نفسه للي بيحيكي له، و كأنه قاله خد الحته دي بتاعتك و أنا أمنتك عليها.

بس الغريب أن كتير من الحكاوي بيبين أد إيه أحنا بنتعلق بالماضي بالأخص اللي ضاع منه، اللي مقدرناش نوصله و اللي أتمنناه و محصلش، مع كل مرة بأسمع حكايات مبلاقيش حكاوي عن اللي يفرح بلاقيها دايماً عن اللي وجع وعلم و ساب ألم و درس، مش عارفة ده ليه علاقة بأننا بنتعلق باللي فات أكتر من اللي جاي، أو بمعني أصح باللي ضاع أكتر من اللي أحنا لاقيناه و فرحنا بيه. مش عارفه ده ليه علاقة بأننا بنصيغ المستقبل و الحاضر باللي أتعلمنا من الماضي فبنركز عليه و يبقي هو محور الحكايات، و لأن اللي ضاع و عَلم بنتعلم منه أكتر فهو بيبقي بطل كل حكايتنا، يمكن يكون ده السبب، مش متأكدة ، بس ساعات أحنا بنستحلي وجع القلب و دور الضحية، بنستحلي دور البطل النبيل اللي مخدش اللي عايزه، أنا شخصياً أكتشفت أني عايشة فالدور ده طول الوقت و فرحانة عشان كده مبعرفش ألعب أدوار غيره.

مش متأكده من حاجة غير أن الماضي و اللي ضاع و متخدتش هو اللي بنتعلم منه علي أد ما بيعلم، و أن الحكايات هدية بيكتب صاحبها للي بيحكي له أقرار أنه واثق فيه و أتنازل ليه عن جزء من نفسه، و كأنه قال ليه خلي بالك منها. عن نفسي هقدر كل حكاية و كل حد حكاها و أحترم عهد الثقة و الود اللي بيتبني لما حد يحكيلي و كمان هنقي اللي أديهم جزء مني بحكايتي عشان لما أديهم حته مني يخلوا بالهم منها.