أيد بابا
في نص ضهري
سيبي
نفسك يا ندا
أفرضي
دراعك
و كمان
أفرضي رجليكي
أيو
بالظبط كده
مش
هتغرقي متخفيش
المياة
هتشيلك
صدقيني
أول مرة
مصدقتوش
و أول ما
شال أيده من ضهري
لميت
دراعي و رجلي
و هوب
وقعت ف المياة
تاني مرة
مسكني نص ماسكة
تالت مرة
سابني و غمضت عيني و المياة شلتني
بعد شوية
فتحت عيني و الشمس دخلت جواها
ضهري
مفروض علي المياة
و الشمس
جوا عنيا
---------------------
و نفس
عميق بقي
سيبي
نفسك يا ندا
المياة
هتشيلك
و الشمس
هتدخل جوا عنيكي
و محدش
هيسند ضهرك
سيبي
نفسك
