الصدق

من وسط كل الصور احنا اللي بنختار عايزين نكون ازاي..

عايزين نكون فين و نحس بإيه، نحب مين، نكره مين، مين يبقي قريب، و مين قربه تقيل..

بنختار نكون صادقين اوي، ولا صدقنا ده صعب علينا و هـ يعيرينا، يعني بنختار نعيش أجبن أو أشجع، ورا ساتر ولا ادام مرايا، مع نفسنا و بوضوح و اخلاص، و لا في توب ناس تانية و بمنتهي الزيف و قلة الحيلة..

يمكن يكون ساعات كتير صعب انك تتحط ادام مرايه نفسك، انك تسألها بجد، هو انتي كده عشان عايزة تبقي كده و حاسة بـ كده، و لا انتي مجرد رد فعل، و شوية شخبطة لناس تانية، عايزة تعيشي الحاجات بصدق لحد الاخر و تكوني صادقة كفاية في تحملها للأخر، و لا انتي بلونة بتتفرقع مع اول خبطة، او اول مواجهة حقيقة لنفسك قصاد نفسك..

من جوا اوي مقتنعة تماماً ان مواجهة النفس و الضعف و الزيف مش سهل، انك تقف ادام مراية نفسك مش سهل، انك تصدق انك ممكن تكون جواك حته مش كويسة، و ان فعلاً نفسك مش ملاك، برضه مش سهل، و انك تعترف بقدر الأذي اللي أذيته لـ غيرك، قدر سواد القلب، قدر الروح المتسخة برضه مش سهل..

بيكون دايماً الأسهل علي الإطلاق هو التخفي، هو الساتر، هو وجود شيء يبلعنا و نستخبي جواه او وراه، و طبعاً طبعاً طبعاً اهم شيء في تلك التوليفة هو انك تسقط اوساخ روحك علي المحيط و تبقي انت الضحية الأولي و الأخيرة..

من اعمق حتة جوايا انا فعلاً بشفق علي كل اللي عايشين جوا ساتر، و المتخفيين و المزيفين، اللي وسخ روحهم عميهم..

حقيقي احنا كائنات في منتهي الضعف، بس ضعفنا ساعات بيكون مؤذي و اول حد بيتأذي هو احنا، لما نركز طاقتنا علي انهاك شخص ما، علي اكل روحه او أذيته، علي تتبعه، و ألمه، بنكون فعلاً مساكين، بنكون في منتهي الغُلب، الغُلب و قلة الحيلة..

هو دايماً بيقول "و اعرض عن الجاهلين" 

دايماً يقولي العفو، العفو يعني السمو و السلام..

العفو يعني تكون انسان، العفو يعني لما تسيب متبصش ورا.. 

و لما تتأذي ابداً متردش الاذي، و لما تحس بوسخ احمي روحك و اجري..

احياناً بنحتاج نوجع عشان نقدر نمشي و منأذيش أكتر..

أحياناً كتر الضغط علي الروح بيخلينا علي وشك الانفجار، انا شخصياً لما بحس ان للحظة كل هذا الكم من الاذي هـ يتحول لشر او رغبه في رد الاذي بأذي، باخد ديلي في سناني و بجري، و بجري بعيد كمان، و عمري ما ببص ورايا..

بوجع اه، بس الوجع بيكون بعد محاولات احتمال طويلة، و بعد مواجهة لنفسي بأن أكتر من كده انا مش هوجع لأ هأذي، و الوجع اقل وطأة من الأذي..

يمكن بحاول اخليكم تبصوا شوية لنفسكم..

تتدعبسوا جواكم و تشوفوا بقي هو يمكن في حاجة غلط..

يمكن في شيء مزيف جوا، و يمكن محتاجين نراجع نفسنا شوية..

رغم أني أشك في كونكم بتراجعوا نفسكم..

بس علي الاقل متأكدة أني قدرت احمي روحي من وسخ نفوسكم..