استنزاف

و كأن أمهاتنا لما جابونا الدنيا كانوا بيثبتولها حقهم في الحياة، بس بدل ما يعيشوا حياتهم هما، عاشوا حياتنا و رسموها، الامهات في مجتمعنا نوعين، ام عايشة لـ روحها باي شكل بقي من الاشكال، سواء نجاح او روقان او رفاهية، و ام دفنت روحها، و استنت ولادها يدوها التمن، واحدة من الاتنين خدت حقها في الحياة و حققت نفسها بشكل او بأخر، و التانية اما فَضلت ولادها عليها بطيب خاطر او هربت من كونها مش بتعرف تثبت وجودها في الدنيا فاثبتت وجودها بانها تجيب عيال، الفكرة ان الاولانية بايعة خالص، و التانية اشترت لحد ما امتلكت ارواح اولادها، انانية الاتنين موجودة، الفرق في التعبير عنها مش اكتر، الحب بقي بين الولاد و الام فين في كل الهري ده؟!

هي اكيد اي ام بتحب ولادها، بس التعبير بقي عنه فين في كل ده؟! و احنا صغيرين بيبقي بالاهتمام بالاكل و اللبس و اللعب، و لما نكبر حبه بيبقي بسمع حكايتنا و اشتراكهم فيها، بس لما نكبر خالص بيبقي باحترمنا و احترام خصوصيتنا، بيبقي بمنطق اللي بيسند مش اللي بيشيل، و اللي بيسند مش دايماً بيدخل في حياة اللي بيسنده، و التعبير الحقيقي عن الحب ده بيكون بانك تراعي حياة ابنك و تديه مساحته و تسيبه يحقق نفسه بالشكل اللي يحبه، انه يبقي مرتاح و سعيد، من غير ما تقتحم ادق تفاصيل حياته او ترغمه بسرد يومي لكل تفصيله عدت عليه، الام ليها حقوق بس العيال و حياة ربنا ليهم حقوق برضه، الام ام بس العيال مش استثمارك في الدنيا، مش عمارة ملك تلمي منها الايجار، و التضحية و الرحمة بتاعة الام و التعب بيكونوا بدافع حب و مسؤلية مش جميل بنتحاسب عليه لما نكبر، الام الحقيقة مش بتمتلك عيالها، و بتعرف ازاي تحترمهم و تقدرهم و تحبهم.

 الام دي للأسف مش أمي، و مش ام بنات كتير غيري، و في اللي بتستلم و في اللي بتتحايل، و في اللي زي اللي بتفضل تحارب و تناهد و كأنها في صراع استنزافي حقير، استنزاف لطاقتك و راحتك و ثقتك في نفسك، استنزاف ممل، بس رغم كونه استنزاف فهو الطريقة الوحيدة اللي ممكن تحافظ فيها علي حقك انك تعيش، حقك انك تكون موجود و مش مجرد مسخ، حقك في ان يبقالك حق، مش عارفة انا هبقي ام عاملة ازاي، و مش عارفة الي اي مدي استنزاف امي لطاقتي هيربي جوايا عقد و كلكيع اعوضها في عيالي، بس عارفة ان جزء من اقتناعي بالصراع ده و حافز مهم لاني افضل اقاوم هو اني مش عايزة اكون زي امي، و لو استسلمت لامتلاكها فمن المؤكد همتلك اولادي، و انا مش هعمل ده، انا مش همتلك بني ادمين، انا مش همتلك حريات، انا كفاية عليا امتلك نفسي و ادافع لها عن حقوقها.