شغف

في صورة بتبقي احلي و هي معكوسة، و ناس بتبقي اجمل بكتير و هي بعيد، دواير كتير جداً جزء من بريقها بينتهي بمجرد انك بقيت جزء منها، و كأنك بدل ما تندمج جواها كسرتها و خرجت من الناحية التانية، و تجارب شغفك بيها يبقي موجود طول ما انت براها و بعد ما تبقي صاحبها ينتهي كل الشغف بيها و كل الانبهار، الحاجات اللي تاخد من طاقتك جداً و تحطك في مشاعر متطرفة اوي اما كره او حب بتنتهي بمنتهي السرعة، و كأنك نفخت فقاعة صابون و في لحظة الهوا خدها في حضنه و فرقعها، كل الحاجات و البني ادمين و الاماكن و التجارب اللي خدت مني طاقتي ع الاخر و حفزتني لاني ابقي جزء منها او حتي احياناً انانيتي خلاتني احب السيطرة عليها انتهت بمجرد فعلها، و اختفت حتي من ذاكرتي او تم اختزالها في لحظتين، انبهار و عدم و دومتم، و كل الحاجات و البني ادمين اللي خدتهم علي مهلي و برفق و بتأني، استقروا في اعماقي و بقوا جزء مني، و وجودهم المادي مبقاش بيأثر علي وجودهم المعنوي و روحي بقت حتة من ارواحهم، السفر و الحاجات الجديدة و البني ادمين الكيوت و كل الحاجات اللي كنت شغوفة اوي بيها و كأن فايتني حاجة لو معيشتهاش هموت ناقصة عمر تلاشت، و كل اللي حبيته او سعيت ليه بتأني و هدوء من غير شعننة او حماس زايد عن حده بقت حته مني و انا حته منها، و هي دي فعلاً انا و هي دي فعلاً اللي لو معيشتش فيها او معاها كنت هموت ناقصه عمر، حماس الحاجات اللي بتلمع بقي بح بخ ميلزمنيش، حماس الحاجات الحقيقة هو ده بقي انا.