الوقت

الوقت دايماً بيكون عامل مهم لنضج أي شيء، الوقت بيعرفنا حاجات كتير عن نفسنا و عن اللي حوالينا، الوقت عامل مهم عشان نوصل لهدف معين و عامل مهم عشان نفهم حدث معين حصل في حياتنا.. الوقت حتي بيخلينا نفهم نفسنا أكتر، أول مرة أخد بالي من عامل الوقت في العلاقات الإنسانية، و إزاي إن أي علاقة في حياتنا عشان تتطور أو حتي تتغير بتحتاج وقت، حتي الفرح و الحزن محتاجين وقت.. حاجات كتير بتحصل و تعدي و أثارها تبان في نفوسنا بعد مدة، ساعات كتير بغفل عامل الوقت لما بحلم و أفضل حزينة كتير علي حلم متحققش، مرة واحد قالي بتحلمي حلم في خمس دقايق بس هو أكيد محتاج وقت أطول عشان يتحقق، حتي العلاقات الإنسانية، الحب، الكره، الإحترام و الصداقة و غيرهم كلهم بيحتاجوا وقت عشان يتكونوا، عشان نحب حد بنحتاج وقت و حتي حبنا بيزيد برضه مع الوقت.. و بنحتاج وقت عشان نحترم حد و عشان نكون صداقة حقيقة مع حد ..

يمكن اللي ساعات بيخوف إننا مع الوقت برضه بنتغير و بنكتشف حاجات كتير مكناش نعرفها عن نفسنا و عن اللي حوالينا، و ساعتها ممكن الحب ده يقل أو يختفي و ممكن الصداقة تبقي أقوي أو نكتشف إننا مكنش ينفع نبقي أصدقاء من الأول، و ممكن كمان اللي إحترامناهم يطلعوا فالسو.. يمكن ده شيء ساعات بيخوف و بيخلق صراع بين اللي إحنا فعلاً حاسيين بيه و بين خوفنا من إننا منفضلش حاسيين بيه.. بس الصراع ده بيتحسم بالصدق و الإخلاص، ما أنا لو صادق في مشاعري و إحساسي تجاه الأخر عمري لاهخاف ولا هحس بالذنب، لو بعبر عن حب حقيقي أو رغبة حقيقة في القرب عمري ما هقلق من أي شيء جي ولا هخاف من أي شكل للعلاقة في المستقبل لأني هكون واثق طول الوقت إني بعبر عن شيء حقيقي جوايا..

أصلاً المشاعر و الإحساس و الود بين الناس بيكونوا وصل و رحمة من ربنا بينا ووقت ما هو بيشاء بيقطعهم.. يبقي ليه الخوف، ما إحنا علي كل الأحوال لا بنتحكم في إننا نحب ولا في إننا نكره..