من غير عنوان (1)

عندي مشكلة عويصة مع جنس الستات كله، مشكلة ليها علاقة بالنفسنة و الغيرة و اللي يقترن بيها رغبة الواحدة الدايمة انها تحسس اللي ادامها انها احسن منها في حاجة، نفس الازمة مع اللي تقطع في فروة واحدة و بعد دقايق تقابلها و تاخدها بالحضن!!

الحقيقة اني عندي مشكلة تانية برضه مع جنس الرجاله كلهم، اللي هما دايما شايفين انهم الاقوم و الاحسن و الاقوي و انه اكسر للبنت ضلع يتطلعلها اربعة و عشرين، مرة كنت بتناقش مع واحد انه في رجالة بتشوف ان البنت اللي عندها شخصية قوية مش من حقها تتجوز و بصراحة هو رد عليا رد في منتهي الحكمة، قالي بمنتهي الفخر اللي في الدنيا "لأ ما هو القوي في الأقوي منه" و كان يعلو وشه ابتسامة بلهاء كده، الصراحة.. الصراحة اقنعني يعني!!!

الفكرة بقي ان الاتنين بني ادمين و الاتنين بيتحركوا من نقطة واحدة و هي فكرة التفضيل او الفوقية او النرجسية المريضة اللي اصلها بيبقي مركبات نقص معقدة، يعني الاتنين زي بعض مرضي، رجالة و ستات، و السؤال اللي بيطرح نفسه عليا كل شوية، هو احنا امراض المجتمع بتاعتنا دي كترت كده ازاي و امتي و هتودينا لفين؟!

 لما ببص لاي مشكلة او عقدة فردية و احاول اسقطها ع الصورة العامة وع المجتمع كـ كل بحس بكم من الغثيان و الحسرة، و كأننا بقينا عايشين في جنينة حيوانات، لا والله ده حتي الجنينة ليها قانون، و بيحترموه كلهم، مش زي الخرابة اللي اسمها دنيا و فيها كائنات بيسموا نفسهم بني ادمين.