السفر رزق، مش السفر في حد ذاته، بس الصحبة و روح
المكان و التجربة في حد ذاتها رزق، كان دايما عندي هوس برحلات الجبل بتاعة
الكلية، و بعد شوية باي رحلات غير تابعة للجامعة او لجهة معينة، و بعدها السفر
خارج مصر، فكل مرة كنت بحس ان فايتني كتير و لازم اسافر، في اللي استفدت منه و
تجربته علمت فيا، و في اللي انتهي زي ما بدا و عرفت بعده ان مفتنيش كتير ولا حاجة
و ان عادي يعني، كسر الحواجز كان مهم، تعديل مفهوم الامان كمان مهم، انك تعتمد علي نفسك و ان كمان الحاجات مش مبهرة اوي زي ما
بنتخيلها من برا كان اهم شيء اتعلمته، السفر، المكان و الناس ثابتين، بس كل واحد
فينا بيعشهم بطريقته و التجربة في الاخر بتكون شديدة الخصوصية زي ما هي كمان شديدة
الاختلاف من حد للتاني، سافروا زي ما انتم تحبوا و زي ما يسعدكم، مش زي ما الناس
كلها بتقول انه ده بيسعد و بيغير و بيعلم، و سافروا جواكم اوي، متخلوش براكم هو
التجربة، جواكم هو الاصل، بيحوش اماكن و ناس و ارواح و يبنيكم من جوا و براكم يبقي
انضج و اصفي.
