انا عمري ما بحب فكرة الخناق علي شيء او شخص او
مكان، مبحبش فكرة الخناق اصلا، مبحبش اني اكون في صراع مع حد، و
الامر بقي اكثر تعقيداً لدرجة اني بقيت بستني الصراع يبتدي عشان اسيبه و امشي، و
في مرحلة متقدمة بقي الصراع يتأخر فانا بعمله بنفسي و اعيش جواه، بس مش بعرف امشي.
الحياة الطف من غير ما ندخل البني ادمين فيها، مقصدش نعيش لوحدنا، بس اقصد من غير ما يكونوا اطراف في حياتنا، او بيحركوا فيها اشياء، او اسباب لاحداث كبيرة او صغيرة، دخول البشر جوا تفاصيل حياتك و جوا حساباتك علي انهم محركين و فاعلين و مسببين متعب ومرهق و بيموت جمال اي شيء، البشر اسباب احياناً، بس احنا اللي بنخلق ليهم مساحاتهم جوانا، احنا اللي بنعملهم احياناً فاعلين و احياناً مفعول بيهم، من غيرهم الدنيا تسير في سلام.
مقصدش نعيش من غيرهم، بس اقصد نتعود اننا في علاقة واحدة مباشرة مع ربنا، و البني ادمين حوالينا بيتفرجوا زينا، مش اطراف صراع، و لا مسببات يسر او حزن او اي شيء، من نفسنا ممكن نكون اسباب لنفسنا او للي حوالينا، من غير انتظار لنتيجة او فعل، بس غير كده نتعامل مع البني ادمين بشكل اخف و ارحم، نعاملهم علي انهم موجوديين بس نجنبهم الفعل، يعني نعتبرهم غير فاعلين و احنا مش مفعول بينا.
مش بعرف اعمل ده، و بخلق صراعات اعيش جواها، و اشرار اكرهم، و حلويين احبهم، بس بقول لنفسي بصوت عالي، في يوم قريب اوي، هتحرر من ارادة البشر، و اركز في اردتي انا و بس، و في الجماد و الزرع و ربنا و بس، و هما كائنات لطيفة موجودة، بس لا هتدي ولا هتاخد.
