دايما يوصلو ا بعد إنتهاء الحكاية
بعد تتر النهاية ماينزل و كلمات شطبنا توصل
فهمهم و إستيعابهم بطيء ولا إحنا اللي رتمنا
سريع
يمكن لأنهم أول مرة يتحطوا في الوضع ده
فبياخدوا وقت و إحنا مبنتحطش غير في الوضع ده طول حياتنا فبنقرا النهاية قبل
الحكاية ما تبتدي !!
يمكن عندنا قدرة علي قرأة المستقبل و الأحداث
و شفافية الإحساس بيها فالموضوع عندنا إحساس أبلغ من حقايق ملموسة بينور الطريق و
يسره و يخلي القرار أسرع و أفضل يمكن !!
يمكن عندهم عمي بصيرة و بصر !! مفيش إحساس .. مفيش فهم .. في حقايق ملموسة فدايما بيفهموا متأخر
.. لأن معطايتهم أقل بكتير مننا و حدود رؤيتهم أضيق من خرم
الإبرة و فهمهم سطحي و أحيانا كتير مبيفهموش أصلا !!
مش قادرة أحدد هي دي نعمة ولا لعنة .. موهبة
تستحق التقدير و لا ملكة بتهلك صاحبها
هل احسن لنا أننا منفهمش أكتر من اللي
حوالينا فنمشي علي نفس الوتيرة و منحسش بغربة و وحدة و كأننا نشاذ وسط عزف متجانس
في قمة التوافق !!
ولا الأحسن أننا نفهم أكتر و نتمتع برؤية و
بصيرة فنختصر الوقت و نتحرك أسرع و نشوف أكتر و تكتر التجارب في الشنطة و الحكايات
في الدفاتر !!
عندي قناعة أن الحكمة و التفكر دايما مرتبطين
بتجارب كتيرة و ناس كتيرة قابلناهم في حياتنا علمونا و علموا علينا... بس علي أد
الحكمة دي ما هي صفة فريدة إلا أنها بردوا مرهقة و مؤلمة أحيانا بحسها بتخلينا بين
طريق من اتنبن إما وحدة و إنعزال و إما ماسكات و تمثيل !!
مبحبش الإتنين .. بكره ملامحي و أنا بمثل و نبرات صوتي و هي مش
طبيعية و بردوا مبحبش الوحدة .. بس أحيانا كتير مبيبقاش في حل غيرها .. يمكن تبان هروب
بس حل .. ساعات كتير تبقي الملاذ الوحيد عشان نعزف اللي أحنا عايزينه من غير ما
نحس إننا نشاذ و من غير ما نضطر نعزف حاجة مش حابنها فتطلع بلا لون ولا طعم ولا
ريحة !!
مش عارفة !!
اللي اعرفه أنكم دايما بتوصلوا بعد ما القطر
يطلع و يمشي و يعدي علي محطات تانية كتير و يكون نسي محطتكم أو تنساها مش هتفرق
بعمد ولا من غير قصد
يمكن لأننا مش علي نفس الصف .. يمكن حد
مستعجل و التاني بطيء و يمكن لأننا زي قضبان القطر جنب بعض دايما بس مش مع بعض
أبدا !!!
