نوفمبر 2013

الحياة كلها عبارة عن ارهاب فكري، الادوات الاكثر انتشار في حياتنا هي انك تحارب الافكار و بس، الاهل بيرهبوا اولادهم فكريا فيتخيل العيال ان ابوهم و امهم يملكون قدرات خارقة يتحكموا بيها في عيالهم، و الدولة ترهب المواطنين فكريا فيامنوا انها السجان و الحامي في نفس الوقت، و المجتمع يرهب المختلفين عن الجمع العام و اللي خارجين عن الصف بدعوة الحلال و الحرام و العيب و اللي يصح و ميصحش فيخافوا من النبذ و الوحدة، و الحقيقة في كل ده انها اشتغالة كبيرة و حرب اوهام و بس، و كل دول قدراتهم محدودة جدا و قوتهم بتيجي من ضعفنا و بس، غير كده هما اغبي و اضعف من كل ده، و حياتهم كلها ادعاءات و حروب نفسية، و ادام ربنا كلنا احرار و لينا ارادة و حق اختيار و تجربة، بس التنازل عن الحق ده ربنا غير مسؤل عنه.

***

كنت بتكلم الصبح عن انه الحزن مش عار، البني ادمين ساعات بتتعالي علي فكرة انها تحزن او تُصاب بخيبة امل او احباط، و كأن هما منزهيين عن ده، و جلال الحزن و هيبته بيختفوا في وسط التعالي ده، حتي الحاجة الجميلة اللي بيعملها الحزن مش بتحصل لما نتعالي عليه او نتنصل منه كأنه وباء، الحزن بيخفض من الانا اللي جوانا و يخلينا نتواضع في رؤية نفسنا و نستقبل اي احباط او خيبة امل علي شيء بتواضع و رحمة، و مع الوقت بنشوف نفسنا ابسط و اهون و بنستقبله بشكل اقل سُخط، مش بنرضي بيه و نستسلم، بس اقصد اننا بنرضي بكونه ضيف علينا لفترة، بنبلعه و نستني لما يتهضم، و يعدي و يغير فينا و يسيب جمال جوانا كمان، انما لما نتعالي عليه او نحب نفسنا اوي لدرجة اننا نستخسرها في الحزن، لا في شيء جميل بيحصل و لا حتي الحزن بيعدي، و بدل ما تبقي فترة، بتبقي تقليد في حياتنا و عادة مهببة.